រាជរដ្ឋាភិបាលកម្ពុជាអណត្តិទី៥សន្យាបន្តដោះស្រាយ និងទប់ស្កាត់ការ​​ប្រែ​​ប្រួល​​​អាកាសធាតុ

​ដោយមើលឃើញថា ការ​ប្រែប្រួល​អាកាស​ធាតុ គឺ​ជា​បញ្ហា​ប្រឈម​ដ៏​ចម្បង ដែល​កំពុង​គំរាម​កំហែង និង​ប៉ះពាល់​​ដល់​ការ​អភិវឌ្ឍ​សេដ្ឋកិច្ច​សង្គម សុខភាព​មនុស្ស និង​ជីវចម្រុះ មន្រ្តីជាន់ខ្ពស់​រាជរដ្ឋាភិ​បាលកម្ពុជា អណត្តិទី៥សន្យាថា នឹង​បន្តដោះស្រាយ និងទប់ស្កាត់​នូវ​បញ្ហាអវិជ្ជមាន​ទាំងឡាយ​ដែលកើតឡើងពី​បញ្ហានេះ ដើម្បីកែ​លម្អ​សន្តិ​សុខស្បៀង និងអាហារូបត្ថម្ភ។

ក្នុងពិធីបិទវេទិកាកសិករថ្នាក់ជាតិលើកទី៤ នៅសាលសន្និសីទ ចតុ​មុខកាលពីរសៀលថ្ងៃ​ទី​១៨តុលា លោក ឈិត សំអាត នាយកប្រ​តិបត្តិ នៃវេទិកាអង្គការមិនមែនរដ្ឋាភិបាល ស្តីពីកម្ពុជា បានឲ្យដឹងថា រយៈពេលពីរថ្ងៃនេះតំណាងកសិករទាំង២៤ រាជធានីខេត្ត ​តំណាង​កសិករ​មកពីប្រទេស​សមាជិក​អាស៊ាន អង្គការមិនមែនរដ្ឋាភិបាល វិស័យ​​ឯកជន ដៃគូអភិវឌ្ឍ និងស្ថាប័នរដ្ឋាភិបាល បានពិភាក្សាគ្នា​យ៉ាង​ល្អិតល្អន់ និងផ្លាស់ប្តូរបទពិសោធន៍        បច្ចេកទេស បច្ចេកវិទ្យា ផែន​ការ​រាជរដ្ឋាភិបាល ទាក់ទង​ទៅ​នឹងកញ្ចប់ថវិកាជាតិសម្រាប់​ការ​អភិវឌ្ឍ​​​ផ្នែកកសិកម្ម និងតម្លៃផលិតផលកសិកម្មនៅលើទីផ្សារ ដើម្បីរិះ​រក​ដំណោះស្រាយលើបញ្ហាប្រឈមនានា ធានាកែលម្អ​សន្តិសុខ​ស្បៀង និងអាហារូបត្ថម្ភ ។

លោក អ៊ួន សុផល តំណាង​កសិករ​ សំណូម​ពរ​ដល់​រដ្ឋាភិបាល​បញ្ចប់ការ​ផ្តល់​ដី​សម្បទាន​សេដ្ឋកិច្ច សុំ​ឲ្យ​ផ្តល់​ពូជ​ស្រូវ​ថ្មី​ដែល​អាច​ទប់ទល់​នឹង​អាកាស​ធាតុ ការ​បណ្តុះបណ្តាល​បច្ចេក​ទេស​ដាំ​ដុះ​ថ្មី​ដល់​កសិករ​នៅ​ជនបទ សុំ​ឲ្យ​ក្រសួង​ពាក់ព័ន្ធ ផ្តល់​ព័ត៌មាន​ស្តីពី​ការផ្លាស់ប្តូរ​អាកាស​ធាតុ​​ឲ្យ​បាន​ជាក់​លាក់ និង​បញ្ចុះ​ការ​ប្រាក់​កម្ចី​សម្រាប់​ធ្វើ​ការ​ងារ​កសិកម្ម​ឲ្យ​បាន​ទាប​ដល់ ១% ទៅ ១,៥%។

ឯកឧត្តម ឧបនាយករដ្ឋមន្រ្តី យឹម ឆៃលី និងប្រធានក្រុមប្រឹក្សា​ស្តារអភិវឌ្ឍវិស័យកសិកម្ម និងជនបទ បានមានប្រសាសន៍ថា ការ​ប្រែ​ប្រួលអាកាសធាតុ សន្តិសុខស្បៀង​និងអាហារូបត្ថម្ភ ពុំមែនជា​បញ្ហា​​ដាច់​ដោយឡែក ឬជាបញ្ហាវិស័យណាមួយតែឯងនោះទេ វាជា​បញ្ហា​អន្តរវិស័យនិង​ពហុជំនាញដែល​ត្រូវមាន​ការចូលរួមពីគ្រប់ស្ថាប័ន​ពាក់​ពន្ធ័។

ឯកឧត្តម បានមានប្រសាសន៍បន្តទៀតថា រាជរដ្ឋាភិបាល​កម្ពុជា​​អាណត្តិទី៥​នឹង​បន្តដោះស្រាយ និងទប់ស្កាត់នូវបញ្ហាអវិជ្ជមាន​ទាំង​ឡាយ ដែលកើតឡើងពី​ការប្រែប្រួល​អាកាសធាតុ សំដៅកែលម្អ​សន្តិសុខស្បៀង និងអាហារូបត្ថម្ភ។

​          ក្នុងពិធីបើកវេទិកានេះដែរ ឯកឧត្តម សាយ សំអាល់ ​រដ្ឋមន្រ្តី​ក្រសួងបរិស្ថានបាន.បញ្ជាក់ថា នៅដើមខែ​វិច្ឆិកាខាង​មុខនេះ រាជរដ្ឋាភិ​បាល​នឹង​ប្រកាសឲ្យប្រើប្រាស់នូវផែនការយុទ្ធសាស្រ្ត​ប្រែប្រួលអាកាស​ធាតុកម្ពុជា ដែលជាផែន​ការ​សកម្មភាពរបស់ជាតិ សម្រាប់ឆ្លើយតប​នឹងការកែ លម្អស្ថានភាពសន្តិសុខស្បៀង និង​អាហារូបត្ថម្ភនៅ​កម្ពុជា។

សូមបញ្ជាក់ថា កន្លងមកនេះក្រសួងបរិស្ថានបានផ្តល់មូនិធិប្រែ​ប្រួល​អាកាសធាតុ ដល់ក្រសួង សា្ថបន័​និង​អង្គការនានា​សម្រាប់អនុវត្ត​គម្រោងចំនួន១១ ដែលមានថវិកាប្រមាណ​ជាង២លាន​ដុល្លា ដែល ផ្តោត​​សំខាន់លើគម្រោងបន្សុំាទៅនឹងការប្រែប្រួលអាកាសធាតុ ដែល​បង្ហាញ​ពីបច្ចេក​ទេសកសិកម្ម ការប្រើ​ប្រាស់ទឹក និងអនាម័យ ប្រពន្ធ័​ស្រោចស្រពដែលធននឹង​អាកាសធាតុ​​ដល់សហគមន៍កសិករជន​បទ។