ការទាញហេតុផលផ្ទាល់មាត់ រវាងកម្ពុជា និងសៀម ស្តីពីជម្លោះប្រាសាទព្រះវិហារ កាលពី ឆ្នាំ១៩៦២ (វគ្គ៤)

            ហេតុដូច្នេះហើយ វាហាក់ដូចជាច្បាស់ណាស់ថា  ព្រំដែនត្រូវបានវាស់វែង និងកំ ណត់រួចហើយ ប៉ុន្តែ សំណួរគឺថា តើអ្វីជាខ្សែព្រំដែននោះ? (ជាពិសេស នៅតំបន់ព្រះវិហារ ) នរណាជាអ្នកកំណត់? ដោយវិធីណា? ហើយតាមបញ្ជារបស់អ្នកណា?។ ការលំបាក់ក្នុង​ការ​ឆ្លើយសំណួរទំាងនេះ គឺស្ថិតនៅត្រង់ថា បន្ទាប់ពីមានកំណត់នៃកិច្ចប្រជុំរបស់គណៈកម្មការ ទី១ នៅថ្ងៃទី០២ ខែធ្នូ ឆ្នាំ១៩០៦ គេមិនឃើញមានការយោងបន្ថែមទាល់តែសោះ នៅក្នុង​កំណត់ហេតុ នៃកិច្ចប្រជុំក្រោយៗមកទៀត ស្តីពីបញ្ហាព្រំដែននៅក្នុងតំបន់ភ្នំដងរែកនេះ​ទេ។

          គេបានដឹងថា នៅពេលគណៈកម្មការ បានបញ្ចប់កិច្ចការរបស់ខ្លួន​សឹងតែអស់ទៅ ហើយ នៅលើដីជាក់ស្តែង ហើយគេកំពុងរង់ចាំរបាយការណ៍ និងផែនទីបណ្តោះអាសន្ន របស់មន្រ្តីឋានលេខាសាស្រ្ត(អនុសេនីយ៍ឯកអ៊ុំ និងអ្នកផ្សេងទៀត)។ របាយការណ៍ និង​ផែន​ទីទំាងនេះ មិនទាន់បានធ្វើរួចរាល់ទេ រហូតដល់ខែកុម្ភៈ មីនា ឆ្នាំ១៩០៧ ដែលតាមធម្ម តា ពេលវេលានេះ គណៈកម្មការនឹងត្រូវជួបប្រជុំគ្នាម្តងទៀត ដើម្បីពិនិត្យពិចារណា លើ របាយការណ៍ និងផែនទីទាំងនេះ។

          គេបានដឹងថា មានកិច្ចប្រជុំមួយត្រូវបានកំណត់ ជាបណ្តោះអាសន្ន ធ្វើនៅថ្ងៃទី៨ ខែមីនា។ នេះពិតជាចេតនា ក្នុងការកោះប្រជុំ ដែលអាចឃើញ តាមរយៈលិខិតកោះប្រជុំ បន្ទាន់ ពីឯកអគ្គរដ្ឋទូតបារាំងប្រចាំក្រុងបាងកក ផ្ញើជូនរដ្ឋមន្រ្តីការបរទេសបារាំងនៅក្រុង​ប៉ារីស ចុះថ្ងៃទី២៣ ខែកុម្ភៈ ឆ្នាំ១៩០៧ ដោយមានអមនូវ របាយការណ៍របស់លោកវរ​សេនីយ៍ឯកBernadrd ប្រធានក្រុមបារាំងនៃគណៈកម្មការ ។នៅក្នុងលិខិតនោះដែរ លោក​ឯក​អគ្គរដ្ឋទូត បានលើកឡើងថា ផែនទី ដែលបង្ហាញឲ្យឃើញនូវព្រំដែន អាចត្រូវបាន​ធ្វើបច្ចុប្បន្នកម្ម ក្នុងរយៈពេលដ៏ខ្លីសមរម្យ ហើយកិច្ចប្រជុំពេញអង្គ របស់សមាជិកគណៈកម្ម​ការបារាំង និងសៀម ប្រហែលជានឹងអាចរៀបចំ ធ្វើនៅមុនថ្ងៃទី១៥ ខែមីនា។ ប៉ុន្តែជាក់ ស្តែង ពុំមានកិច្ចប្រជុំណាមួយ ត្រូវបានប្រារព្ធឡើងនោះទេ។ ក្នុងពេលជាមួយគ្នានោះដែរ រដ្ឋាភិបាលទំាងពីរ បានដំណើរការចរចាលើសន្ធិសញ្ញាព្រំដែនថ្មីមួយទៀត។ សន្ធិសញ្ញា នេះ ដែលត្រូវបានចុះហត្ថលេខា នៅថ្ងៃទី២៣ ខែមីនា ឆ្នាំ១៩០៧ បានចែងអំពីកាដោះដូរ ទឹកដី និងបទប្បញ្ញត្តិច្បាស់លាស់ទាក់ទងនឹងព្រំដែនទំាងអស់ ដែលមិនបានចែងនៅក្នុង​ដំណោះស្រាយ នៃសន្ធិសញ្ញា ឆ្នាំ១៩០៤មុន។

          ដូច្នេះ គណៈកម្មការចម្រុះកំណត់ព្រំដែនទី២ ត្រូវបានបង្កើតឡើងតាមសន្ធិសញ្ញា ឆ្នាំ១៩០៧។ ដូចដែលបានលើកឡើងពីខាងដើម កិច្ចការមួយចំនួនរបស់គណៈកម្មការនេះ គឺកំណត់ផ្នែក នៃតំបន់ភ្នំដងរែក ដែលមិនស្ថិតនៅក្រោម ដែនសមត្ថកិច្ចរបស់គណៈកម្មការ ទី១ និយាយឲ្យចំ ចាប់ពីច្រកកិលទៅទិសខាងលិច។ ដូច្នេះហើយ មិនរួមបញ្ចូលតំបន់ព្រះ វិហារ ដែលស្ថិតនៅទិសខាងកើតនៃច្រកនោះទេ។ តាមពិតមានការងារជាន់គ្នាខ្លះៗ​រវាង​គណៈកម្មការ ទំាងពីរនៅក្នុងតំបន់កិល ប៉ុន្តែការងារជាន់គ្នានេះ  មិនលាតសន្ធឹងដល់តំបន់​ព្រះ​វិហារនោះទេ។