កម្ពុជា ស្នើឲ្យឡាវ គោរពលក្ខខណ្ឌ នៃកិច្ចព្រមព្រៀង

 ប្រមុខរាជរដ្ឋាភិបាលកម្ពុជា បានលើកឡើងថា កម្ពុជាមិន​ជំទាស់នឹងការសាងសង់ទំនប់​វារី​អគ្គិសនី សាយ៉ាបុរីទេ តែស្នើឲ្យភាគី​ឡាវ គោរពនូវរាល់លក្ខខណ្ឌ ដែលព្រមព្រៀងជាមួយ គ្នានាពេលកន្លង​មក។

ថ្លែងក្នុងកិច្ច ប្រជុំកំពូលអាស៊ី អឺរ៉ុប លើកទី៩ ជាមួយ ឯកឧត្តម ជុំម៉ាលី សៃយ៉ាសន ប្រធាន​រដ្ឋ នៃសាធារណរដ្ឋ ប្រជា​ធិបតេយ្យ​ប្រជា​មានិតឡាវ កាលពីថ្ងៃទី៤ ខែវិច្ឆិកា ឆ្នាំ២០១២ នៅ​វិមាន​រដ្ឋ ហរខាំ  សម្តេច​តេជោនាយករដ្ឋមន្រ្តីហ៊ុន សែន បានមានប្រសាសន៍ថា កម្ពុជា មិនជំ​ទាស់​ការសាងសង់ទំនប់វារីអគ្គិសនី​ សាយ៉ាបុរី ដែលមានកម្លាំង​ឋាមពលជាង១ពាន់មេហ្គាវ៉ាត់ នេះទេ តែកម្ពុជាសូមឲ្យភាគីឡាវ ធ្វើ​យ៉ាងណា គោរពនូវរាល់លក្ខខណ្ឌ ដែលភាគីពាក់ព័ន្ធ​ទាំងអស់ ក្នុង​តំបន់​អនុទន្លេមេគង្គ បានព្រមព្រៀងគ្នា កាលពីពេលកន្លងមក ដូចជា​ការ មិន​បង្វែរចរន្តទឹក នៃអាងទន្លេមេគង្គជាដើម។

យោងតាមកិច្ចព្រមព្រៀងនេះ ប្រទេសទាំងអស់ នៃមហាអនុតំ​បន់​ទន្លេមេគង្គ ដែលមានកម្ពុជា ឡាវ វៀតណាម និងថៃ ត្រូវតែយល់​ព្រម​លើកិច្ច ព្រមព្រៀង គម្រោងទំបន់វារីអគ្គិសនីណាមួយ ទើបភាគី​ពាក់​​ព័ន្ធខាងលើអាច​ដំណើរការសាងសង់បាន។ ​

តាំងពីដើមរៀងមក កម្ពុជា និងវៀត​ណាម​បានជំទាស់​យ៉ាង​ខ្លាំងក្លា ចំពោះគម្រោងទំនប់សាយ៉ាបុរីនេះ ព្រោះទំនប់នេះ នឹងធ្វើឲ្យ​ប៉ះ​ពាល់​ដល់សក្តានុពល​ជីវៈចម្រុះ បរិស្ថាន និងជីវិតរស់នៅ​របស់​មនុស្ស និងសត្វរាប់លានជីវិត នៅកម្ពុជា និងវៀត​ណាម។ ប្រទេស​​ឡាវ នឹងសាងសង់ទំនប់វារីអគ្គិសនី សាយ៉ាបុរី ជាផ្លូវ​ការ នៅ​សប្តាហ៍​នេះ។

ឆ្លើយតប ចំពោះសំណើខាងលើ ឯកឧត្តម ជុំម៉ាលី សៃយ៉ាសន បានជម្រាបជូនសម្តេច តេជោហ៊ុនសែនថា ប្រទេសឡាវ តែងតែ​គោរព​នូវរាល់មតិរបស់ប្រទេសជិតខាង ហើយប្រ សិនបើ​ការសាងសង់ទំនប់​វារីអគ្គិសនីនេះ ធ្វើឲ្យផលប៉ះពាល់នោះ ប្រទេសឡាវ នឹងមិនធ្វើការ​សាង​សង់ទេ។

គួររំលឹកថា កាលពីពាក់កណ្តាលខែតុលា ឆ្នាំ២០១២ របស់ក្រ​សួង​​ការងារ និងសេដ្ឋកិច្ច នៃ​ប្រទេសហ្វាំងឡង់ បានចេញសេចក្តី​ជូនដំណឹងមួយ  ដែលមានខ្លឹមសារថា ប្រទេស​ហ្វាំង​ឡង់ នឹងធ្វើការ​ស៊ើប​អង្កេតទៅលើក្រុមហ៊ុន Po yry ដែលជាក្រុមហ៊ុនពហុជាតិ មានទី​តាំងនៅ​ប្រទេស​ហ្វាំងឡង់ ក្រោយ​ពីប្រទេសនេះ ទទួលបាន​ពាក្យ​បណ្តឹង​ពីអង្គការក្រៅ​រដ្ឋាភិបាល​ចំនួន១៥ ទាមទារ​ឲ្យរដ្ឋាភិ​បាល​ហ្វាំង​ឡង់ពិនិត្យ និង​ពិចារណា លើការវាយតម្លៃ ផលប៉ះពាល់  ដែលក្រុម​​ហ៊ុន មួយនេះ បានផ្តល់ទៅឲ្យរដ្ឋាភិបាលឡាវ។

ក្នុងពាក្យបណ្តឹង ដែលសង្គមស៊ីវិលទាំង១៥ ប្តឹងទៅប្រទេស​ហ្វាំង​ឡង់ មានខ្លឹមសារថា ក្រុម ហ៊ុនPo yry បានល្មើសនឹងស្តង់ដារ​ពាណិជ្ជ​កម្ម ដែលទទួលខុសត្រូវដោយប្រទេសហ្វាំងឡង់ និង បាន​ខ្ជះខ្ជាយមូលនីធិសាធារណៈតាមរយៈការធ្វើប្រឹក្សា គំាទ្រលើគម្រោង​សាង​សង់​ទំនប់​វារីអគ្គិសនីសាយ៉ាបុរី ទោះបីទំនប់នេះ ត្រូវបានជំទាស់​យ៉ាងដាច់អហង្កា ដោយប្រទេសកម្ពុជា និងវៀតណាម​ក្តី។